எம்.ஜி.ஆரின் வாழ்க்கை வரலாறு முதன்முறையாக திரைப்படமாகிறது!

மறைந்த நடிகரும், முன்னாள் முதல்வருமான எம்.ஜி.ஆரின் வாழ்க்கை வரலாறு திரைப்படமாகிறது.இதில் எம்.ஜி.ஆர் ஆக ஜெ.எம்.பஷீர் நடிக்கிறார். இவர் 'தேசிய தலைவர்' என்ற படத்தில் பசும்பொன் முத்துராமலிங்கத் தேவராக நடித்தவர்.

எம்.ஜி.ஆருடன் நெருங்கிப் பழகியவர்கள், குடும்பத்தினர், அரசியல் நிர்வாகிகள், அரசு அதிகாரிகள், சக நடிகர்-நடிகைகள் மற்றும் திரையுலகப் பிரபலங்களின் அனுபவங்களுடன் உருவாகிறது.

எம்.ஜி.ஆரின் வாழ்க்கை வரலாறு, அவரது பெயரிலேயே “புரட்சித்தலைவர் எம்.ஜி.ஆர்.” என்ற தலைப்பில் முதன்முறையாக திரைப்படமாக உருவாகிறது.

நாடக மேடையில் தனது கலைப் பயணத்தைத் தொடங்கி, பின்னர் வெள்ளித்திரையில் கதாநாயகனாக உயர்ந்து, தனது நடிப்பாலும் மனிதநேயத்தாலும் கோடிக்கணக்கான மக்களின் மனதில் நீங்கா இடம்பிடித்தவர் எம்.ஜி.ஆர். அரசியல் களத்தில் அண்ணாதுரை உடன் இணைந்து பயணித்த அவர், பின்னர் 17.10.1972 அன்று அண்ணா திராவிட முன்னேற்றக் கழகம் (அ.தி.மு.க.) என்ற பெயரில் தனிக்கட்சியைத் தொடங்கி, தேர்தல் அரசியலில் களம் கண்டார். தொடர்ந்து தமிழகத்தின் முதல்வராகப் பொறுப்பேற்று, தனது ஆட்சிக்காலத்தில் பல்வேறு மக்கள் நலத்திட்டங்களை முன்னெடுத்தார்.

திரைப்படம், அரசியல், மக்கள் சேவை என பல்வேறு தளங்களில் தனக்கென ஒரு வரலாற்றை உருவாக்கிய எம்.ஜி.ஆரின் வாழ்க்கை இன்றும் தலைமுறைகளைத் தாண்டி பேசப்படும் ஒன்றாக உள்ளது.

இந்த திரைப்படம் வெறும் வாழ்க்கை வரலாற்றை மட்டும் பதிவு செய்யாமல், எம்.ஜி.ஆருடன் நெருங்கிப் பழகி, அவருடன் பயணித்தவர்கள், அவரது குடும்ப உறுப்பினர்கள், அரசியல் கட்சி நிர்வாகிகள், அவரது ஆட்சிக்காலத்தில் பணியாற்றிய அரசு அதிகாரிகள், சக நடிகர்-நடிகைகள் மற்றும் திரையுலகப் பிரபலங்கள் ஆகியோரின் நேரடி அனுபவங்களையும் நினைவுகளையும் அடிப்படையாகக் கொண்டு உருவாகிறது.

எம்.ஜி.ஆரின் தனிப்பட்ட வாழ்க்கை, திரைப்பயணம், அரசியல் வளர்ச்சி, மக்கள் தொடர்பு, மனிதநேயம் மற்றும் முதல்வராக அவர் ஆற்றிய பணிகள் உள்ளிட்ட பல்வேறு பரிமாணங்கள் திரைப்படத்தில் இடம்பெற உள்ளன.

எம்.ஜி.ஆர். கட்சி தொடங்கிய அக்டோபர் 17ம் தேதி, அவர் வாழ்ந்த ராமாவரம் தோட்ட இல்லத்தில், முக்கிய பிரபலங்கள் முன்னிலையில் இப்படத்தின் படப்பிடிப்பு தொடங்க உள்ளது.

படத்தின் இயக்குனர், தயாரிப்பாளர், நடிகர்-நடிகைகள் உள்ளிட்ட முக்கிய திரைப்படக் குழுவினர் குறித்த அதிகாரப்பூர்வ அறிவிப்பு விரைவில் வெளியாகும்.