ஜெயிலர் 2 : நடிப்பதைத் தவிர்த்த ஷாரூக்கான்?

நெல்சன் திலீப்குமார் இயக்கத்தில் ரஜினிகாந்த் நடித்து வரும் படம் 'ஜெயிலர் 2'. இப்படத்தின் படப்பிடிப்பு தற்போது ஐதராபாத்தில் நடந்து வருகிறது. கடந்த வாரம் இப்படத்தின் படப்பிடிப்பில் கலந்து கொண்ட மலையாள நடிகர் மோகன்லால் அவர் காட்சிகளை நடித்து முடித்தார். கன்னட நடிகர் சிவராஜ்குமாரும் இப்படத்தில் சிறப்புத் தோற்றத்தில் நடிக்கிறார். அதுபோல ஹிந்தி நடிகர் ஷாரூக்கானும் நடிப்பதாக ஒரு தகவல் வெளியானது.

ஆனால், தற்போது ஷாரூக் நடிக்கவில்லை என்று சொல்கிறார்கள். அவர் தற்போது நடித்து வரும் 'கிங்' ஹிந்திப் படத்திற்காக உள்ள தோற்றத்துடன் வேறு படங்களில் நடிப்பதை விரும்பவில்லையாம். அதனால், இந்தப் படத்தில் நடிக்கக் கேட்டபோது அதை தவிர்த்து விட்டார் என்கிறார்கள். மேலும் இது குறித்து அவர் நடிகர் ரஜினிகாந்த்திடம் பேசியதாகவும் ஒரு தகவல் உள்ளது.

'ஜெயிலர் 2' படத்தில் யார் யார் நடிக்கிறார்கள் என்பது குறித்து அதிகாரப்பூர்வ அறிவிப்பு வரும் வரை இப்படியான தகவல்களும், செய்திகளும் வந்து போகும். தமிழக சட்டசபைத் தேர்தல் முடிந்த பிறகு இப்படத்தின் அப்டேட் வெளியாகும் என்று எதிர்பார்க்கப்படுகிறது.