ராஷ்மிகா மந்தனாவின் மைசா படத்தில் புரட்சிகரமான விஜயசாந்தி படப்பாடல் ரீமிக்ஸ்!
அறிமுக இயக்குநர் ரவீந்திர புல்லே இயக்கத்தில், ராஷ்மிகா மந்தனா நடிப்பில் உருவாகி வரும் பான்-இந்தியப்படம் மைசா. இப்படம் மிகப் பிரம்மாண்டமான பொருட்செலவில் தயாராகி வருகிறது. இதுவரை வெளியான படத்தின் பர்ஸ்ட் கிளிம்ப்ஸ், டீசர் மற்றும் இரண்டு பாடல்கள் உள்ளிட்ட விளம்பர உள்ளடக்கங்கள் ரசிகர்களிடையே பெரும் ஆர்வத்தை ஏற்படுத்தியுள்ளன.
இந்நிலையில், படக்குழுவினர் தற்போது படத்தின் மூன்றாவது தனிப்பாடலான ஒசே ராமுலம்மா பாடலை வெளியிட்டுள்ளனர். தெலுங்கு சினிமாவின் மிகச்சிறந்த அடையாளங்களில் ஒன்றான பாடலின் புதுப்பிக்கப்பட்ட வடிவமே இது. விஜயசாந்தி நடிப்பில் வெளியான, ஒசே ராமுலம்மா படம் பாக்ஸ் ஆபிஸில் வரலாறு படைத்ததுடன், ரசிகர்கள் மனதில் இன்றும் நீங்கா இடம்பிடித்துள்ளது. தற்போது, மைசா படக்குழுவினர் இந்தப் பிரபலமான பாடலை புதிய இசை வடிவத்துடன் மீண்டும் கொண்டு வந்துள்ளனர்.
இந்த இரண்டு படங்களுக்கும் இடையிலான தொடர்பு பாடலோடு மட்டும் நின்றுவிடவில்லை. ஒசே ராமுலம்மா படத்தில் விஜயசாந்தி பழங்குடியினப் பெண்ணாக நடித்ததைப் போலவே, மைசா படத்தில் ராஷ்மிகா மந்தனாவும் ஒரு துணிச்சலான பழங்குடியினப் பெண்ணாக நடித்துள்ளார். பழைய நினைவுகளை மீட்டெடுக்கும் விதமாக, மூலப் பாடலை உருவாக்கிய இசையமைப்பாளர் வந்தேமாதரம் ஸ்ரீனிவாஸ் மற்றும் பாடலாசிரியர் டாக்டர் சுத்தால அசோக் தேஜா ஆகியோர் இந்தப் புதிய பதிப்பிற்காக மீண்டும் இணைந்துள்ளனர்.
மைசாவின் கதாபாத்திரத்திற்கும், அவரது அஞ்சாத குணத்திற்கும் ஏற்ப பாடல் வரிகள் மாற்றியமைக்கப்பட்டுள்ளன. வந்தேமாதரம் ஸ்ரீனிவாஸ் இப்பாடலுக்குத் தனது குரலையும் கொடுத்துள்ளார். இசையமைப்பாளர் ஜேக்ஸ் பிஜாய், பாடலின் அசல் உணர்வு மாறாமல் அதற்கு ஒரு புதிய பரிமாணத்தைக் கொடுத்துள்ளார். பவானி வாசா, அஸ்வினி செபுரி, அபிக்யா தனிகெல்லா, விநாயக், வெங்கி மற்றும் நானி ஆகியோரின் துடிப்பான பின்னணி குரல்கள் பாடலுக்கு மேலும் உத்வேகம் அளித்துள்ளன.
இந்த ரீமிக்ஸ் பாடல், நவீன இசைத் தொடுதலுடன் மூலப் பாடலின் வசீகரத்தை மீண்டும் கொண்டு வந்துள்ளது. படம் திரையரங்குகளில் வெளியாகும்போது, ராஷ்மிகாவின் ஆற்றல்மிக்க நடிப்பும் காட்சியமைப்புகளும் இப்பாடலை இன்னும் தாக்கத்தை ஏற்படுத்துவதாக மாற்றும் என எதிர்பார்க்கப்படுகிறது. பழைய பாடலை அறிந்தவர்களுக்கு, இந்தப் புதிய பதிப்பு பழைய நினைவுகளை அசைபோடும் விருந்தாக அமையும்.
இப்படத்தில் ராஷ்மிகா மந்தனா முற்றிலும் மாறுபட்ட தோற்றத்தில், அதிரடி ஆக்ஷன் கதாபாத்திரத்தில் நடித்துள்ளார். மைசா படம் தமிழ், தெலுங்கு, ஹிந்தி, கன்னடம் மற்றும் மலையாளம் ஆகிய மொழிகளில் நவம்பர் 27-ஆம் தேதி திரையரங்குகளில் வெளியாகவுள்ளது.