ரஷ்யாவிடம் கச்சா எண்ணெய் வாங்குவதால் இந்தியாவுக்கு, வரியை 50 சதவீதமாக அதிபர் டிரம்ப் உயர்த்தி உள்ளார். இந்த, அமெரிக்காவின் முடிவு என்பது நியாயமற்றது. நேர்மையற்றது, என மத்திய வெளியுறவுத்துறை அமைச்சகம் என திட்டவட்டமாக தெரிவித்துள்ளது.

அதிபர் டிரம்பின் வரிவிதிப்பு குறித்து சமூக வலைதளத்தில் ராகுல் வெளியிட்டுள்ள பதிவில் கூறி இருப்பதாவது: டிரம்பின் 50% வரி என்பது பொருளாதார அச்சுறுத்தல், இந்தியாவை நியாயமற்ற வர்த்தக ஒப்பந்தத்திற்குள் தள்ளும் முயற்சி ஆகும். இவ்வாறு அவர் கூறியுள்ளார்.

முழுமையான மவுனம்

இது தொடர்பாக காங்கிரஸ் பொதுச் செயலாளர் ஜெயராம் ரமேஷ் வெளியிட்டுள்ள அறிக்கை: இந்தியாவிற்கும், பாகிஸ்தானுக்கும் இடையில் போர் நிறுத்தத்தை ஏற்படுத்துவதில் தான் தலையிட்டதாக அதிபர் டிரம்ப் 33 முறை கூறியுள்ளார்.

அதே நேரத்தில் பிரதமர் மோடி இது குறித்து முழுமையான மவுனத்தை கடைபிடித்தார். ஜூன் 18, 2025 அன்று, டிரம்ப் பாகிஸ்தான் ராணுவத் தளபதி பீல்ட் மார்ஷல் அசிம் முனீரை வெள்ளை மாளிகையில் மதிய உணவிற்கு அழைத்தபோது, பிரதமரும் அவரது நெருங்கிய உதவியாளர்களும் முழுமையான மவுனத்தை கடைபிடித்தனர்.

டிரம்ப் உலக வர்த்தக அமைப்பை அழித்தார். ஆனால் இந்தியா எதிர்ப்பு தெரிவிக்கவில்லை. டிரம்ப் உலக சுகாதார நிறுவனம், யுனெஸ்கோ மற்றும் பாரிஸ் காலநிலையிலிருந்து விலகியுள்ளார். ஆனாலும் இந்தியா ஒரு மவுனப் பார்வையாளராகவே இருந்தது.

இப்போது டிரம்ப் ஒருபுறம் பிரதமர் மோடியின் நண்பர் என்று கூறிக் கொள்கிறார், மறுபுறம் இந்தியாவை கடுமையாகவும் அநியாயமாகவும் தாக்குகிறார். அவர் விதித்த வரிகளும் தண்டனை நடவடிக்கைகளும் முற்றிலும் ஏற்றுக்கொள்ள முடியாதவை, ஆனால் உண்மை என்னவென்றால், வெளியுறவுக் கொள்கை முழுமையான தோல்வியடைந்துள்ளது.

1970களில் இந்திரா பிரதமராக இருந்தபோது இந்தியா அமெரிக்காவின் கொடுமைப்படுத்துதலை எதிர்கொண்டது. பிரதமர் மோடி தனது ஈகோவை விட்டு உயர்ந்து, அவரது பங்களிப்பை சிதைத்து அவதூறு செய்வதற்குப் பதிலாக, அமெரிக்கா போன்ற ஒரு சக்திக்கு எதிராக எவ்வாறு நிற்பது என்பது குறித்து அவரிடமிருந்து உத்வேகம் பெற வேண்டும்.

இந்தியாவின் வெளியுறவுக் கொள்கை மற்றும் நிர்வாக முறைக்கு இப்போது ஒரு விரிவான மாற்றம் தேவை. இவ்வாறு அவர் கூறியுள்ளார்.