கோட்டையின் எதிர்புறத்தில் மீன் சேமியா விற்பனை செய்யப்படுகிறது. மக்கள் ஆர்வமுடன் ருசித்து உண்பர். பெயர் தான் மீன் சேமியா. ஆனால் அவர்கள் இடியாப்பத்தை தான் பயன்படுத்துகின்றனர்.

செய்முறை

 முதலில் 10 காய்ந்த மிளகாய், 10 பல் பூண்டு, ஒரு துண்டு இஞ்சியை, 150 மில்லி லிட்டர் சுடு தண்ணீரில் போட்டு, 15 நிமிடம் ஊறவிடுங்கள். பின், ஆறிய பின், மிக்சியில் போட்டு பேஸ்ட் போன்று அரைத்து கொள்ளவும்.

 இதில், பாதி எலுமிச்சை சாறு சேருங்கள். ஒரு டீஸ்பூன் உப்பு சேர்க்கவும். சிறிதளவு பேஸ்டை தனியாக எடுத்து வைத்து கொள்ளுங்கள். கடைசியில் தேவைப்படும்.

 இரண்டு ஸ்பூன் சோளமாவை, துண்டு துண்டாக வெட்டப்பட்ட மீனில் தடவி வைக்கவும்.

 வாணலியில் எண்ணெய் ஊற்றி, மீன் துண்டுகளை இருபுறமும் தலா மூன்று நிமிடங்கள் வறுத்து எடுத்து கொள்ளுங்கள்.

 அதே வாணலியில் ஒரு ஸ்பூன் எண்ணெய் ஊற்றி, அதில் பச்சை மிளகாய் ஒன்றை பொடியாக வெட்டி போடவும். இதனுடன் கொஞ்சம் கறிவேப்பிலை சேருங்கள்.

 சிறிது நேரம் கழித்து, இரண்டு வெங்காயத்தை பொடியாக நறுக்கி போட்டு வதக்கவும். தேவையான அளவு உப்பு சேர்த்தால், சீக்கிரமாக வதங்கிவிடும்.

 அடுத்ததாக, ஒரு பெரிய தக்காளியை போட்டு, பேஸ்டை சேர்க்கவும்.

 பச்சை வாடை போன பின், ஒரு முட்டையை உடைத்து ஊற்றுங்கள். ஒரு பாக்கெட் இடியாப்பத்தை உடைத்து போட்டு, 'கொத்து புரோட்டா' செய்வது போன்று கொத்தவும்.

 இத்துடன் ஒரு ஸ்பூன் எண்ணெய், ஒரு ஸ்பூன் மிளகு துாள் போடுங்கள். சிறிது நேரத்தில் சுவையான வேலுார் மீன் சேமியா ரெடி.

- நமது நிருபர் -