முதல்வர் ஸ்டாலினை, 'அங்கிள்' என்று த.வெ.க. தலைவர் விஜய் பேசியது தி.மு.க.வினரை கொந்தளிக்க செய்துள்ளது. இதை சுட்டிக்காட்டி, பல அமைச்சர்களும், தி.மு.க. நிர்வாகிகளும் விஜய்யை கடுமையாக விமர்சித்து வருகின்றனர்.

திருச்சியில் நிருபர்கள் சந்திப்பில், அமைச்சர் நேரு கூறியதாவது:

விஜயின் தராதரம் அவ்வளவு தான். ஒரு மாநிலத்தின் முதல்வர், பெரிய கட்சி தலைவர், 40 ஆண்டு காலம் அரசியலில் இருக்கிறார்.

நேற்று அரசியலுக்கு வந்துவிட்டு, அவர் அதுமாதிரி சொல்வது எல்லாம், தரம் தாழ்ந்த விமர்சனம் செய்கிறார். மக்கள் அதுக்கு நல்ல பதில் சொல்வார்கள். நாங்களும் தேர்தலில் அதற்கு நல்ல பதில் சொல்வோம்.

அதில் எல்லாம் ஒன்றும் மாற்றமில்லை. 10 பேர், 50 பேர் கூடிவிட்டார்கள் என்பதற்காக மாநில முதல்வரை எப்படி வேண்டுமானாலும் பேசலாம் என்பது எவ்வாறு சரியாக இருக்கும்?

இவ்வாறு, நேரு கூறினார்.