அமெரிக்காவின் நியூயார்க்கில், யு.எஸ்., ஓபன் கிராண்ட்ஸ்லாம் டென்னிஸ் தொடர் நடக்கிறது. இதன் பெண்கள் ஒற்றையர் பிரிவு 2வது சுற்றில் பிரிட்டனின் எம்மா ரடுகானு, இந்தோனேஷியாவின் ஜானிஸ் டிஜென் மோதினர். அபாரமாக ஆடிய ரடுகானு 6-2, 6-1 என்ற நேர் செட் கணக்கில் வெற்றி பெற்று 3வது சுற்றுக்குள் நுழைந்தார்.

மற்றொரு 2வது சுற்றில் அமெரிக்காவின் எம்மா நவரோ 6-2, 6-1 என சகவீராங்கனை கேட் மெக்னல்லியை வீழ்த்தினார்.

கோகோ காப் வெற்றி: முதல் சுற்றில் அமெரிக்காவின் கோகோ காப், ஆஸ்திரேலியாவின் அஜ்லா டாம்ல்ஜனோவிக் மோதினர். முதல் செட்டை 6-4 எனக் கைப்பற்றிய கோகோ காப், 'டை பிரேக்கர்' வரை சென்ற 2வது செட்டை 6-7 என இழந்தார். வெற்றியாளரை நிர்ணயிக்கும் 3வது செட்டில் எழுச்சி கண்ட இவர், 7-5 என போராடி வென்றார். முடிவில் கோகோ காப் 6-4, 6-7, 7-5 என்ற கணக்கில் வெற்றி பெற்று 2வது சுற்றுக்கு முன்னேறினார்.

மற்றொரு முதல் சுற்றில் ஜப்பானின் நவோமி ஒசாகா 6-3, 6-4 என்ற நேர் செட் கணக்கில் பெல்ஜியத்தின் கிரீட் மின்னெனை தோற்கடித்தார். மற்ற முதல் சுற்று போட்டிகளில் அமெரிக்காவின் அமண்டா அனிசிமோவா, பிரேசிலின் பீட்ரிஸ் ஹட்டா மையா, சீனாவின் ஜின்யு வாங் வெற்றி பெற்றனர்.

சின்னர் வெற்றி: ஆண்கள் ஒற்றையர் பிரிவு முதல் சுற்றில் உலகின் 'நம்பர்-1' இத்தாலியின் ஜானிக் சின்னர், செக்குடியரசின் விட் கோப்ரிவா மோதினர். அபாரமாக ஆடிய சின்னர் 6-1, 6-1, 6-2 என்ற நேர் செட் கணக்கில் வெற்றி பெற்று 2வது சுற்றுக்கு முன்னேறினார்.

மற்றொரு முதல் சுற்றில் ஜெர்மனியின் அலெக்சாண்டர் ஸ்வெரேவ் 6-2, 7-6, 6-4 என சிலியின் அலெஜான்ட்ரோ டபிலோவை வீழ்த்தினார். மற்ற முதல் சுற்று போட்டிகளில் ஆஸ்திரேலியாவின் அலெக்ஸ் டி மினார், இத்தாலியின் லோரென்சோ முசெட்டி, அமெரிக்காவின் டாமி பால், கனடாவின் ஷபோவலோவ், பெலிக்ஸ் ஆகர்-அலியாசிம் உள்ளிட்டோர் வெற்றி பெற்றனர்.