பா.ம.க., நிறுவனர் ராமதாஸ் பேட்டி: தமிழகத்தின் பல பகுதிகளில் கடந்த சில நாட்களாக நடந்து வரும் கொலை, தாக்குதல், பெண்கள், குழந்தைகள் மீதான வன்கொடுமைகள், பழிக்குப்பழியாக நடக்கும் வன்முறை சம்பவங்கள், பொதுமக்களிடையே கடும் அச்சத்தையும், பாதுகாப்பின்மையையும் ஏற்படுத்தியுள்ளன. புதிய தமிழக அரசு தனது நிர்வாக திறனை, சட்டம் - -ஒழுங்கு பாதுகாப்பில் முழுமையாக வெளிப் படுத்த வேண்டிய கட்டாயம் ஏற்பட்டுள்ளது.

தி.மு.க., ஆட்சி வீட்டுக்கு போக, இந்த மாதிரி வன்முறை சம்பவங்களும் ஒரு காரணம் என்பதை, தமிழக வெற்றிக் கழக அரசு கவனத்தில் எடுத்துக்கணும்!

த.மா.கா., தலைவர் வாசன் அறிக்கை: தமிழக வெற்றிக் கழகம் ஆட்சி பொறுப்பேற்ற பின், விவசாய கடன்கள் முழுமையாக தள்ளுபடி செய்யப்படும் என, விவசாயிகள் எதிர்பார்த்து காத்திருந்தனர். தற்போதைய விவசாய கடன் தள்ளுபடி அறிவிப்பு, குறுகிய எண்ணிக்கையிலான விவசாயிகளுக்கு மட்டுமே பயன் தரும். பெரும் நஷ்டத்தில் இருக்கும் பல விவசாயிகளுக்கு, இந்த கடன் தள்ளுபடி அறிவிப்பால் பயன் இல்லை. தேர்தலுக்கு முன் த.வெ.க., அறிவித்த வாக்குறுதிகளை, காலம் தாழ்த்தாமல் முழுமையாக நிறைவேற்ற வேண்டும்.

புதுசா ஆட்சிக்கு வந்தவங் களுக்கு, ஆறு மாதங்கள் அவகாசம் தரலாமே!

அ.தி.மு.க.,வில் இருந்து விலகி, தற்போது எந்த கட்சியிலும் சேராத முன்னாள் அமைச்சர் செம்மலை அறிக்கை: புதிதாக ஆட்சி பொறுப்பேற்றிருக்கும் கட்சி மீது, ஆட்சி அமைக்கும் ஆசையில் இருந்த கட்சிகள் வைக்கும் விமர்சனங்கள், ஆத்திரத்துடன் கூடிய வன்மத்தால் வெளிப்படும் வார்த்தைகளாகவே இருக்கின்றன. பெருந்தலைவர் காமராஜர் சொன்னது போலவே, ஆட்சியாளர்களுக்கு ஆறு மாத காலம் அவகாசம் கொடுக்கலாமே.

இந்த அறிவுரை, இவரது முன்னாள் தலைவர் பழனிசாமிக்கு தான் என்பது நல்லாவே தெரியுது!