பீஹாரில், முதல்வர் நிதிஷ் குமார் தலைமையிலான ஐக்கிய ஜனதா தளம் கட்சி, பா.ஜ., கூட்டணி ஆட்சி நடக்கிறது. இந்த கூட்டணியில், லோக் ஜனசக்தி கட்சியும் இடம் பெற்றுள்ளது.

கடந்த நவம்பரில் நடந்த பீஹார் சட்டசபை தேர்தலில், 28 தொகுதிகளில் போட்டியிட்டு, 19 இடங்களில் லோக் ஜனசக்தி கட்சி வெற்றி பெற்றது. இதனால், மிகவும் உற்சாகத்தில் இருக்கிறார் சிராக் பாஸ்வான்.

பீஹார் தலைநகர் பாட்னாவில் சமீபத்தில் நடந்த, தன் உறவினர் வீட்டு திருமணத்தில் சிராக் பங்கேற்றார். அங்கிருந்தவர்கள், நடனமாடும்படி சிராக்கை வற்புறுத்தினர்.

சற்றும் தயங்காமல் மேடையேறிய சிராக், சில ஆண்டுகளுக்கு முன், தான் நடித்த ஹிந்தி திரைப் படத்தில் இடம் பெற்ற பாடலுக்கு நடனமாடி, அனைவரையும் மகிழ்வித்தார்.

அரசியலுக்கு வரும் முன், சில ஹிந்தி திரைப் படங்களில் நடித்தார் சிராக். ஆனால், தன் தந்தையும், முன்னாள் மத்திய அமைச்சருமான ராம்விலாஸ் பாஸ்வான் இறந்ததால், அரசியலுக்கு வர வேண்டிய கட்டாயம் இவருக்கு ஏற்பட்டது.

திருமண விழாவில், சிராக்கின் நடனத்தை பார்த்த அரசியல்வாதிகள் சிலர், 'அரசியல் கை கொடுக்காவிட்டாலும் பரவாயில்லை... சினிமாவில் நடித்து சிராக் பிழைத்து கொள்வார்...' என கிண்டல் அடித்தனர்.