'கிங்' படத்தின் 'து மில் ஜாயே' பாடலுக்காக எட் ஷீரனுக்கு எவ்வளவு நன்றி கூறினாலும் போதாது! - ஷாருக்கான் நெகிழ்ச்சி!
ADDED : 8 hours ago
ஷாருக்கானின் பிறந்தநாளை முன்னிட்டு, நவம்பர் 2ம் தேதி அன்று, அவர் நடிப்பில் வரவிருக்கும் 'கிங்' படத்தின் 'து மில் ஜாயே' என்ற பாடலை படக்குழுவினர் வெளியிட்டனர். இந்தப் பாடல் படத்தில் ஷாருக்கானின் கதாபாத்திரத்திற்கு இருக்கும் வில்லத்தனம் சார்ந்த தன்மையை உணர்த்துகிறது. மேலும், இதில் அவர் தீபிகா படுகோனேவுடன் இணைந்து நடித்துள்ளார். இதன் படமாக்கலும், ஷாருக்-தீபிகா ஜோடியும், 2023ல் வெளியான 'பதான்' படத்தின் 'பெஷரம் ரங்' பாடலை நினைவூட்டுவதாக ரசிகர்கள் ஒப்பிட்டு வருகின்றனர்.
இந்தப் பாடலின் மற்றொரு சிறப்பம்சம் என்னவென்றால், புகழ்பெற்ற பாடகரும் பாடலாசிரியருமான எட் ஷீரன் இதில் பாடியுள்ளார். சச்சின்-ஜிகார் இசையமைத்துள்ள இப்பாடலுக்கு குமார் வரிகளை எழுதியுள்ளார். து மில் ஜாயே பாடல் மூலம் எட் ஷீரன் இந்தி சினிமாவில் பின்னணி பாடகராக அறிமுகமாகியுள்ளார். இப்பாடலை அவருடன் இணைந்து அரிஜித் சிங் மற்றும் மதுபந்தி பாக்சி ஆகியோரும் பாடியுள்ளனர். கடந்த செவ்வாய்க்கிழமை அன்று, எட் ஷீரன் தான் எவ்வாறு இப்பாடலின் ஒரு பகுதியாக மாறினார் என்பது குறித்துப் பேசினார். தனது இன்ஸ்டாகிராம் ஸ்டோரீஸ் பக்கத்தில், பதிவுக்கூடத்தில் தான் முதல் முயற்சியிலேயே ஹிந்தி வரிகளைச் சரியாகப் பாடும் வீடியோவைப் பகிர்ந்துள்ளார்.
அந்த வீடியோவில், நீங்கள் இந்தியில் பாடுவது இதுவே முதல் முறையா? என்று கேட்கப்பட்டதற்கு, எட் ஷீரன் ஆம் என்று பதிலளிக்கிறார். மேலும், அந்த வீடியோவின் தலைப்பில், நான் முதன்முதலில் ஷாருக்கானைச் சந்தித்தபோது, தனது அடுத்த படத்தில் நான் ஒரு பாடல் உருவாக்க வேண்டும் என்றும், அதுவே எனது முதல் பாலிவுட் பாடலாக இருக்க வேண்டும் என்றும் அவர் கூறினார். கடந்த சில வருடங்களாக நாங்கள் ஒருவரையொருவர் நன்கு அறிந்து கொண்டுள்ளோம், எனக்கு அவரை மிகவும் பிடிக்கும். நான் கடைசியாக இந்தியா வந்திருந்தபோது, அரிஜித் சிங் மற்றும் எனக்கான சாபையர் இசை வீடியோவில் அவர் ஒரு கவுரவத் தோற்றத்தில் நடிக்க வேண்டும் என்பதற்காக அவரது வீட்டிற்குச் சென்றேன். அன்று அவர் என்னை சச்சின்-ஜிகாரிடம் அறிமுகப்படுத்தினார். அன்றிரவே அவருடைய கிங் படத்திற்காக து மில் ஜாயே பாடலின் எனது பகுதியை எழுதிப் பதிவு செய்தேன். என்னுடன் சேர்ந்து அரிஜித் சிங்கும் இந்தப் பாடலைப் பாடியிருப்பது எனக்கு மிகவும் மகிழ்ச்சியளிக்கிறது. எனக்குப் பிடித்த அனைத்து மனிதர்களும் ஒரே திட்டத்தில் இணைந்துள்ளனர் என்று பதிவிட்டிருந்தார்.
இதற்குப் பதிலளிக்கும் விதமாக ஷாருக்கான், என் நண்பரே, இந்தப் பாடலைச் செய்ததற்காக, முக்கியமாக அந்த ஹிந்தி வரிகளைப் பாடியதற்காக உனக்கு எவ்வளவு நன்றி சொன்னாலும் போதாது. அன்புடன், எட் ஷீரன் என பகிர்ந்துள்ளார்.