 பிளவர்ஹார்ன் தவிர, மற்ற அரவணா வகை மீன்களை, இந்தியாவில் ப்ரீடிங் (இனப்பெருக்கம்) செய்வதில்லை. இவை, இந்தோனேசியா, சிங்கப்பூர், மலேசியா உள்ளிட்ட நாடுகளில் உள்ள, நன்னீர் ஏரிகளில் உற்பத்தியாவதால், அங்கிருந்து தான், இறக்குமதி செய்து விற்கப்படுகிறது.

 சீனா, கம்போடியா, வியட்நாம் நாட்டினர், அரவணா வகை மீன்களை வாஸ்துக்காக வளர்க்கின்றனர். இங்கும், தற்போது சிலர் இதை பின்பற்றுகின்றனர்.

 அரவணா வகை மீன்களின் அளவு, விலையை பொறுத்து, 'பேசிக்', 'பிரீமியம்', 'எக்ஸாடிக்' என மூன்று வகையாக பிரித்து விற்கப்படுகிறது. இதில், பிரீமியம் வகை மீன்களை இறக்குமதி செய்து விற்கிறேன்.

 பேசிக் வெரைட்டியில், சில்வர், ஆல்பினோ சில்வர், கிரீன், பஞ்ஜாரா, கோல்டன் பேர்ள் வாங்கலாம். இதன் விலை, 3 ஆயிரத்தில் இருந்து, 60,000 ரூபாய் வரை, அக்குவாரியம் கடைகளில் விற்கப்படுகிறது.

 பிரீமியம் வெரைட்டியில், ப்ளூ பேஸ் கிராஸ்பேக், 24 கே கிராஸ்பேக், சூப்பர் ரெட் வகை, ஒன்றரை லட்சம் ரூபாய் முதல் விற்கப்படுகிறது. இதன் நிறம், மினுமினுப்பு தன்மை மாறவே மாறாது.

 எக்ஸாடிக் வெரைட்டியில், பட்டர்பிளை ப்ளூ பேஸ் அரவணாவுக்கு, தனி ரசிகர் பட்டாளமே உள்ளது. இவ்வகை மீன்களுக்கு வால் இருக்காது. அதன் துடுப்புகள் இதய வடிவில் இணைந்து காணப்படும். இது, தண்ணீரில் நீந்தும் நளினத்திற்கே, சில லட்சங்களை கொடுத்து, மக்கள் வாங்குகின்றனர்.

 ஒரு மீன் வளர, குறைந்தபட்சம் 4 அடி நீளம், 2 அடி அகலம் மற்றும் உயரம் கொண்ட டேங்க் இருப்பது அவசியம்.

 இதன் வளர்ச்சியை பொறுத்து, உணவின் அளவு மாறுபடும். அதீத உணவு கொடுக்கக்கூடாது. செரிமான பிரச்னை ஏற்பட்டால், மீன்கள் வாந்தி எடுக்கும்.

 இதுதவிர, வயிற்றுக்குள் அதிகளவு தண்ணீர், காற்று இருந்தாலும், மீன்கள் சாப்பிடாமல் அடம்பிடிக்கும். இச்சமயங்களில், குடல்புழு நீக்க மருந்து கொடுத்தால், அவை பழைய நிலைக்கு திரும்பி, சுறுசுறுப்பாக நீந்தும்.

 இவை, 10-15 ஆண்டுகள் உயிர்வாழும். வீட்டிலுள்ளோர் டேங்க் அருகில் வந்தாலே, அவர்களையும் தம்முடன் நீந்த அழைப்பது போல, துடுப்பை அசைக்கும்.