கோவை, வேடப்பட்டியில், யாழி கென்னல் நடத்தி வருகிறார் ராம்குமார்; பொறியியல் பட்டதாரி. 15 ஆண்டுகளாக, 'ப்ரீடிங்' துறையில், பல்வேறுஇன நாய்களை இனப்பெருக்கம் செய்கிறார். பொமரேனியன் இன பப்பி பற்றி சுவாரஸ்யமான தகவல்களை, நம்மிடம் பகிர்ந்தார்.

அவை:

* பொமரேனியன் இனத்தில், இண்டியன் ஸ்பிலிட், கல்சர், மினியேச்சர், ஸ்டாண்டர்டு, பாக்கெட் சைஸ் என ஐந்துவிதமான அளவுகளில், இனப்பெருக்கம் செய்யப்படுகிறது. இதில், பாக்கெட் சைஸ் பப்பி, மிகச்சிறியதாக இருப்பதால் மார்கெட்டில் அதிக விலைக்கு விற்கப்படுகிறது.

* இது ஜெர்மன் நாட்டை சேர்ந்தது. வெளிநாட்டில் இருந்து இந்தியாவுக்கு இறக்குமதி செய்யப்பட்ட இனங்களில், மிக பழமையானது. இங்கே இனப்பெருக்கம் செய்வதால், நம் நாட்டின் தட்பவெப்ப சூழலுக்கு, தகவமைத்து கொண்டது.

* சிறிய இனங்களிலே, 12-16 ஆண்டுகள் வாழக்கூடியது. நோய் எதிர்ப்பு சக்தி அதிகம். நியூட்ரீஷியன் உணவுகளை தேடி வாங்கி கொடுக்க வேண்டிய அவசியமில்லை. குறைந்த அளவே உணவு சாப்பிடும். அதிக முடி இருப்பதால், பராமரிப்பில் கவனம் செலுத்த வேண்டும்.

* எப்போதும் சுறுசுறுப்பாக இருப்பதோடு, வீட்டிலிருப்பவர்களோடு அதிகம் விளையாடி கொண்டே இருக்கும். குறைவான நேரமே துாங்கும். புதிதாக நாய் வளர்ப்பவர்களுக்கு ஏற்ற இனம். சிறியதாக இருந்தாலும், எந்நேரமும் அலர்ட்டாக இருப்பதால், பாதுகாப்புக்கு ஏற்றது.

* ஒரு குட்டி 'டான்' போல வலம்வரும். பெரிய இன பப்பிகளை பார்த்தால் சற்றும் பயப்படாமல், குரைத்து வம்புக்கு இழுக்கும். இதன் சின்ன குரல்வளையில் இருந்து வரும் வித்தியாசமாக சத்தம் தான், நம்மை ஆச்சர்யப்படுத்தும்.

* குரைத்தே ஒருவரை பயமுறுத்திவிடும். புதிய நபர்கள், திருடர்கள் இதனிடம் தப்பவே முடியாது. வித்தியாசமாக சத்தமிட்டு காட்டி கொடுத்துவிடும்.

* அதீத சுறுசுறுப்பாக இருப்பதால், உங்களின் வாழ்க்கை முறைக்கு ஏற்ப பயிற்சி அளித்து, வளர்ப்பது நல்லது. எல்லா வயதினரும் வளர்க்கலாம். வீட்டில் ஒரு குழந்தையின் சேட்டையை, இதன் துறுதுறு செயல்பாட்டில் இருந்து அறியலாம், என்றார்.