பிரபல விண்வெளி ஆய்வாளர் ஸ்டீவன் ஹாக்கிங்ஸ், இயற்பியல் விஞ்ஞானி ஐன்ஸ்டைன் ஆகியோர் வேற்றுகிரவாசிகள் பல்வேறு கிரகங்களில் வாழ்ந்துவரலாம் என்றும் அவர்கள் நம்மைவிட தொழில்நுட்பத்தில் மேம்பட்டவர்களாகவும் இருக்கலாம் எனவும் தெரிவித்துள்ளனர். பலநூறு ஒளி ஆண்டுகளைத் தாண்டிப் பயணிக்கும் விண்வெளி ஓடங்கள் அவர்களிடம் இருக்கலாம் எனவும் கூறப்படுகிறது. ஆனால் இது எதற்குமே ஆதாரப்பூர்வமான சாட்சிகள் இல்லை. இந்நிலையில் அமெரிக்க விண்வெளி ஆய்வு மையமான நாசா, இதுதொடர்பான தொடர் ஆய்வில் ஈடுபட்டு வருகிறது.

வேற்று கிரகங்களில் ஏலியன்கள் உள்ளனரா என்கிற ஆராய்ச்சியை நாசா தற்காலிகமாகக் கைவிட்டுவிட்டது. இதனையடுத்து யூஎஃப்ஓ எனப்படும் பறக்கும் தட்டுகள் குறித்த ஆராய்ச்சிக்காக தற்போது நாசா ஒரு புதிய விஞ்ஞானிகள் குழுவை உருவாக்கியுள்ளது. இதற்கு யூஎஃப்ஓ டாஸ்க் ஃபோர்ஸ் (UFO taskforce) எனப் பெயரிட்டுள்ளது.

அமெரிக்காவின் ஃப்ளோரிடா மாகாணத்தில் விண்ணில் ஒரு யூஎஃப்ஓ படமெடுக்கப்பட்டது. அமெரிக்க ராணுவத் தலைமையகமான பென்டகனில் இதேபோல யூஎஃப்ஓ பறந்ததாக தகவல் உள்ளது. இதேபோல நூற்றுக்கணக்கான தரவுகள் தற்போது சேகரிக்கப்பட்டு யூஎஃப்ஓ டாஸ்க் ஃபோர்ஸ் வசம் ஒப்படைக்கப்பட்டுள்ளன. இவற்றை வைத்து யூஎஃப்ஓ-க்கள் குறித்த ஆராய்ச்சியில் ஈடுபட இக்குழு திட்டமிட்டுள்ளது. இந்த ஆராய்ச்சி முடிவு ஏலியன்கள் குறித்த ஆராய்ச்சிக்கு எதிர்காலத்தில் உதவிகரமாக இருக்குமென நாசா நம்புவது குறிப்பிடத்தக்கது.