என்னதான், ஏஐ(AI), ரோபோக்கள் போன்ற அறிவியல் கண்டுபிடிப்புகள் ஏராளமாக வரத்தொடங்கினாலும், நாம் பெரும்பாலும் இந்த ஜெயன்ட் ரோபோக்களை ஹாலிவுட் படங்களிலும் கேம்களிலும், கார்ட்டூன்களிலும் தான் பார்த்திருப்போம்... ஹாலிவுட் பிரம்மாண்ட படங்களான டிரான்ஸ்பார்மர்ஸ், அவதார், ரியல் ஸ்டீல் உள்ளிட்ட படங்களில் மிகப்பெரிய ரோபோக்கள் இடம்பெற்றிருக்கும். அதேபோல் நிஜ உலகிலும் ரோபோக்கள் வரவுள்ளன. அதன்படி, ஜப்பானை மையமாக கொண்டு இயங்கும் ட்சுபாமே இண்டஸ்ட்ரீஸ் (Tsubame Industries) எனும் ஸ்டார்டப் நிறுவனம், 4.5-மீட்டர் உயரமுள்ள ஒரு ராட்சஸ டிரான்ஸ்ஃபார்மர்ஸ் (Transformers) ரோபோவை உருவாக்கி விற்பனைக்கு அறிமுகப்படுத்தியுள்ளது.

ஆர்சக்ஸ் (ARCHAX) என பெயரிடப்பட்டுள்ள இந்த ரோபோ, 14.8 அடி உயரம் கொண்டுள்ளது. இதன் இயங்ககளுக்கு, நான்கு சக்கரங்கள் பொருத்தப்பட்டுள்ளன. அதுமட்டுமல்லாமல், இந்த ரோபோவை உள்ளிருந்து இயக்குவதற்காக கேமரா மற்றும் மானிட்டர்களுடன் கூடிய காக்பிட் (cockpit area with monitors and camera) வழங்கப்பட்டுள்ளது. இதன்மூலம் உள்ளே இருந்தபடியே ஒட்டுமொத்த ரோபோவையும் கண்ட்ரோல் செய்யமுடியும். அதற்காக ஜாய்ஸ்டிக் வடிவில் கண்ட்ரோலர்கள் வழங்கப்பட்டுள்ளது.

மேலும் இது 'ரோபோ பயன்முறை' (robot mode) மற்றும் 'வாகனப் பயன்முறை' (“vehicle mode”)என்று 2 மோட்களில் இயங்கும். மணிக்கு 10 கிலோமீட்டர் வரை பயணிக்குமாம். இந்த ஆர்சக்ஸ் ரோபோவின் விலை, 3 மில்லியன் டாலராக நிர்ணையம் செய்யப்பட்டுள்ளதாக அந்நிறுவனத்தின் சிஇஓ ரியோ யோஷிடா தெரிவித்தார். அதுமட்டுமல்லாமல், இந்த ரோபோ, வரும்காலங்களில், பேரழிவு நிவாரணத்திற்காக அல்லது விண்வெளி துறையில் பயன்படுத்த முடியும் எனக்கூறினார்.