அமெரிக்க அதிபர் டிரம்ப், எடுத்தேன் கவிழ்த்தேன் என முடிவுகளை எடுக்கக் கூடியவர். அவர் பதவிக்கு வந்த நாள் முதல் இத்தகைய தடாலடி முடிவுகளால் அமெரிக்கா மட்டுமின்றி ஒட்டுமொத்த உலக நாடுகளும் பாதிக்கப்பட்டுள்ளன.

இன்று அவர் எடுத்துள்ள அதிர்ச்சி அளிக்கும் முடிவால் அமெரிக்க நிதித்துறையில் பெரும் பரபரப்பு ஏற்பட்டுள்ளது.

அமெரிக்காவின் பெடரல் ரிசர்வ் அமைப்பின் கவர்னர் லிசா குக். இந்த பதவியை வகித்த முதல் ஆப்பிரிக்க-அமெரிக்க பெண். இவர் மீது பெடரல் ஹவுசிங் பைனான்ஸ் ஏஜென்சி இயக்குநரான பில் புல்டே, அடமான மோசடி குற்றச்சாட்டுகளை தெரிவித்து இருந்தார்.

ஜார்ஜியா மற்றும் மிக்சிகனில் அவர் அடமானம் வைத்துள்ள சொத்துகளின் ஆவணங்கள் மோசடியானவை, 2021ம் ஆண்டு அளித்த விண்ணப்பங்களில் லிசா குக் அளித்த தகவல்கள் தவறானவை என்றும் பில் புல்டே கூறி இருந்தார். இந்த குற்றச்சாட்டை அடுத்து, லிசா குக் தாமாகவே முன் வந்து ஆக.20ம் தேதிக்கு ராஜினாமா செய்ய வேண்டும் என்று அதிபர் டிரம்ப் அறிவித்து இருந்தார்.

ஆனால் டிரம்பின் கோரிக்கையை ஏற்க மறுத்து லிசா குக், தொடர்ந்து அப்பணியில் நீடித்து வந்தார். இந் நிலையில், பெடரல் ரிசர்வ் வங்கி கவர்னர் லிக் குக் பணிநீக்கம் செய்யப்பட்டு உள்ளதாக டிரம்ப் ட்ரூத் சோஷியல் பக்கத்தில் வெளியிட்டுள்ளார்.

முன்னதாக, தம்மீதான குற்றச்சாட்டுகளுக்கு பதிலளித்து இருந்த லிசா குக், என் மீதான மோசடி புகார்களுக்கு எதிரான ஆதாரங்களை சேகரித்து வருகிறேன். விரைவில் அவற்றை வழங்குவேன் என்று கூறி இருந்தார். 2022ம் ஆண்டு அப்போதைய அதிபர் ஜோ பைடனால் நியமிக்கப்பட்டவர் லிசா குக் என்பது குறிப்பிடத்தக்கது.