குறைந்த விலையில் கிடைக்கும் உணவுப்பொருட்களின் தரத்தை அறியாமல் அவற்றை சாப்பிடும் போது வாந்தி, வயிற்றுப்போக்கு ஏற்படும் அபாயம் உள்ளது.

உணவுப்பாதுகாப்புத்துறை சார்பில் மதுரை மாவட்டத்தில் கடந்தாண்டில் (2023 - 2024 ) பால், பட்டர், பனீர் பொருட்களின் 43 மாதிரிகள் சேகரிக்கப்பட்டு ஆய்வு செய்யப்பட்டன. அதில் 35 மாதிரிகள் தரமுள்ளதும், 8 மாதிரிகள் தரம் குறைந்ததும் கண்டறியப்பட்டது.

வெள்ளைநிற உணவுப்பொருட்களில் கலப்படம் செய்துள்ளதை எளிய பரிசோதனைகளின் மூலம் வீட்டிலேயே தரத்தை கண்டறியலாம் என உணவுப் பாதுகாப்புத்துறை மாவட்ட நியமன அலுவலர் ஜெயராம பாண்டியன்.

அவர் கூறியதாவது:

பாலில் தண்ணீர் இருப்பதை கண்டறிய ஒரு சொட்டு பாலை சுத்தமான சாய்வான தளத்தில் விட வேண்டும். பாலாக இருந்தால் வெள்ளைத்தடம் பதித்து மெதுவாக கீழே செல்லும். தண்ணீர் இருந்தால் வெள்ளைத்தடமின்றி நேரடியாக கீழே செல்லும். 5 மில்லி பாலுடன் அதே அளவு தண்ணீர் ஊற்றி நன்றாக குலுக்க வேண்டும்.

சலவைத்துாள் கலந்திருந்தால் தடிமனான படலம் உருவாகும். இல்லாவிட்டால் மெல்லிய படலமாக தெரியும். பால்பொருட்கள், பனீரில் கலப்படம் இருப்பதையும் கண்டறியமுடியும். 3 மில்லி பால் அல்லது பால் பொருட்களுடன் 5 மில்லி தண்ணீர் சேர்த்து கொதிக்க வைத்து ஆறவிட வேண்டும்.

இதில் 2 அல்லது 3 சொட்டு டிங்சர் அயோடின்சேர்க்கும் போது கலவை நீல நிறமானால் ஸ்டார்ச் (மாவுப்பொருள்) சேர்க்கப்பட்டுள்ளதென அர்த்தம்.இல்லாவிட்டால் வெள்ளைநிறம் மாறாது.

வெண்ணெய், நெய்யில்பிசைந்த உருளைக்கிழங்கு மற்றும் ஸ்டார்ச் கலந்திருக்கலாம். கண்ணாடி கிண்ணத்தில் அரை தேக்கரண்டி வெண்ணெய் அல்லது நெய் எடுத்து 2 அல்லது 3 சொட்டு டிங்சர் அயோடின் சேர்த்தால் நீலநிறமாக மாறும். சுத்தமான வெண்ணெய், நெய்யில் நிறம் மாறாது.

எளிய முறைகளின் மூலம் கடையில் வாங்கும் பொருட்களின் தரத்தை அறிந்து வாட்ஸ் அப்பில் 94440 42322ல் புகார் செய்யலாம் என்றார்.