பழநி நகராட்சி கூட்டம் தலைவர் உமா மகேஸ்வரி(தி.மு.க.,) தலைமையில் நடந்தது. துணைத் தலைவர் கந்தசாமி (கம்யூ.), கமிஷனர் விநாயகம் , பொறியாளர் ராஜவேலு, இளநிலை பொறியாளர் பாலசுப்பிரமணியம், நகர அமைப்பு அலுவலர் புவனேஸ்வரன், சுகாதார அலுவலர் செந்தில் ராம்குமார் முன்னிலை வகித்தனர். கவுன்சிலர்கள் விவாதம் :

நடராஜ் (அ.தி.மு.க.,): மோட்டார் பைப் சரி செய்ய நடவடிக்கை எடுக்க வேண்டும்.

தலைவர்: தகுந்த நடவடிக்கை எடுக்கப்படும்.

சரவணன் (தி.மு.க.,): சத்யா நகரில் பாதாள சாக்கடை திட்டத்தால் பைப் லைன்கள் சேதமடைந்துள்ளன. ஆரம்ப சுகாதார நிலையத்திற்கு சுற்றுச்சுவர் அமைக்க வேண்டும்.

தலைவர்: பாதாள சாக்கடை திட்டத்தை கண்காணிக்க நடவடிக்கை எடுக்கப்படும். சுகாதார நிலையத்திற்குசுற்றுச்சுவர் அமைக்கப்படும்.

துணைத்தலைவர் : இ.எஸ்.ஐ., ரோட்டில் சிவகிரி பட்டியிலிருந்து கழிவுகள் கொட்டப்படுகின்றன. இதனால் அப்பகுதியில் பொதுமக்கள் நடக்க முடியாத சூழல் ஏற்படுகிறது. சுகாதாரச் சான்று நகராட்சியில் யாரிடம் வாங்க வேண்டும்.

சுகாதார அலுவலர்: சுகாதாரச் சான்று கமிஷனரிடம் அனுமதி பெற்று வழங்கப்படும். இதுவரை சுகாதார சான்று கேட்ட விண்ணப்பங்கள் வரவில்லை.

ராசு (அ.தி.மு.க.,): பெரியப்பா நகர் காமராஜர் நகர் பகுதிகளில் குடிநீர் குழாய் உடுமலை ரோட்டில் சாக்கடை சரி செய்ய வேண்டும்.

தலைவர்: நடவடிக்கை எடுக்கப்படும்.

பத்மினி முருகானந்தம் (காங்.,): நகராட்சி அருகில் உள்ள ஊராட்சிகளை இணைக்க நடவடிக்கை எடுக்கப்படுமா.

தலைவர்: இதுவரை அரசிடம் இருந்து எந்த ஆணையும் வரவில்லை.

சுரேஷ் (தி.மு.க.,): பாலாறு பொருந்தலாறு அணையில் குடிநீர் எவ்வளவு உள்ளது. சண்முக நதி கரையில் அமைக்கப்பட்டுள்ள எரிவாயுமயானம் திறக்கப்படுவது எப்போது . நகராட்சி எல்லையில் அலங்கார வளைவுகள் அமைக்க திட்டம் உள்ளதா.

தலைவர்: 75 புதிய குடிநீர் இணைப்பு விண்ணப்பங்கள் பெறப்பட்டுள்ளன. ரூ 25ல் இணைப்புகள் வழங்க இயலாத நிலையில் உள்ளது. நகராட்சி எல்லைகளுக்கான அலங்கார வளைவு அமைக்க திட்டம் இல்லை.விரைவில் எரிவாயு மயானம் பயன்பாட்டிற்கு வரும்.

செபாஸ்டியன் (தி.மு.க.,): பாதாள சாக்கடை திட்டம் செயல்படுத்தப்படும் போது இணைப்புகள் அமைக்கப்படும் இடங்களில் கண்காணிப்பு தேவை.

வீட்டு மனைகளுக்கு பாதாள சாக்கடை இணைப்புகள் வழங்கப்படுமா. பாதாள சாக்கடை ஒப்பந்ததாரர் மெத்தனமாக பணிபுரிகிறார். இதனால் சாலை அமைத்த பின் சிரமம் ஏற்படும்.

தலைவர்: பாதாள சாக்கடை திட்டத்தை தனி பொறியாளர் மூலம் கண்காணிக்க நடவடிக்கை எடுக்கப்படும்.

இளநிலை பொறியாளர்: பாதாள சாக்கடை திட்டம் தொடர்ந்து கண்காணிக்க நடவடிக்கை எடுக்கப்படும். பாதாள சாக்கடை திட்டம் முழுவதும் நிறைவடைந்த பிறகு சோதனை அடிப்படையில் செயல்பாடுகளை ஆய்வு செய்த பிறகு தான் சாலை அமைக்கப்படும்.

சாகுல் ஹமீது (தி.மு.க.,): பஸ் ஸ்டாண்ட் பகுதியில் ஒரு கோடி ரூபாய்க்கு வருமானம் ஆண்டுதோறும் வருகிறது. அதற்கு தனி காவலாளி அமைக்க வேண்டும். அங்குள்ள இலவச கழிப்பறை சேதமடைகிறது. ஆனால் கட்டண கழிப்பறைகள் சேதம் அடைவது இல்லை.

தலைவர்: நடவடிக்கை எடுக்கப்படும்.

செபாஸ்டின் (தி.மு.க.,): பாலாறு பொருந்தலாறு அணையில் தண்ணீர் குளத்திற்கு செல்கிறது. தற்போது தண்ணீரின் அளவு குடிநீருக்கு வழங்கும் அளவைவிட குறைந்து வருகிறது. இதனால் பழநி நகருக்கு தண்ணீர் பற்றாக்குறை ஏற்படும்.

இவ்வாறு விவாதம் நடந்தது