மதுக்கரை வனச்சரகத்திற்குட்பட்ட குப்பனூரில், நேற்றுமுன்தினம் அதிகாலை, விளைநிலத்திற்குள் புகுந்த ஒற்றை பெண் யானை, தனியார் கட்டுமான நிறுவனத்திற்கு சொந்தமான இடத்திற்குள் புகுந்தது. அங்கிருந்த கழிவு சேற்றில் சிக்கியது. வனத்துறையினர், 3 மணி நேரம் போராடி, சேற்றில் இருந்து யானையை மீட்டனர்.

யானை உடல் பலவீனமாகி, எழுந்து நிற்க முடியாமல் இருந்தது. இதனையடுத்து, நேற்றுமுன்தினம் காலை, 10:30 மணி முதல் வனக்கால்நடை மருத்துவ குழுவினர் விடிய, விடிய சிகிச்சையளித்தனர். யானையின் உடல்நலம் வேகமாக முன்னேறியது.

இதனையடுத்து, மதுக்கரை வனச்சரகத்திற்குட்பட்ட தீத்திபாளையம், அய்யாசாமி கோவில் வனப்பகுதியில், நேற்று காலை, 8:00 மணிக்கு, வனத்துறையினர், ஒற்றை காட்டு யானையை விடுவித்தனர். தொடர்ந்து யானையை கண்காணித்து வருவதாக வனத்துறையினர் தெரிவித்தனர்.