சென்னையில் ஏ.டி.பி., சாலஞ்சர் டென்னிஸ் தொடர் நடக்கிறது. இதன் ஒற்றையர் பிரிவு இரண்டாவது சுற்றில் இந்தியாவின் சசிகுமார் முகுந்த், துனிசியாவின் மோயஸ் எச்சார்குய் மோதினர். 'டை பிரேக்கர்' வரை நீடித்த முதல் செட்டை 7-6 எனக் கைப்பற்றிய சசிகுமார், இரண்டாவது செட்டை 6-3 என தன்வசப்படுத்தினார். முடிவில் சசிகுமார் முகுந்த் 7-6, 6-3 என்ற கணக்கில் வெற்றி பெற்று காலிறுதிக்குள் நுழைந்தார்.

இரட்டையர் பிரிவு காலிறுதியில் இந்தியாவின் ரித்விக், நிக்கி பூனாச்சா ஜோடி 5-7, 6-1, 10-7 என சகநாட்டை சேர்ந்த பரிக்சித் சோமனி, மணிஷ் சுரேஷ் குமார் ஜோடியை வீழ்த்தியது.

மற்றொரு காலிறுதியில் இந்தியாவின் சாகேத் மைனேனி, ராம்குமார் ராமநாதன் ஜோடி 4-6, 6-4, 10-6 என நெதர்லாந்தின் டான் ஆடேடு, பிரான்சின் யுகோ பிளான்செட் ஜோடியை வீழ்த்தியது.

மற்ற காலிறுதியில் இந்தியாவின் அர்ஜுன் காடே - யு ஹசியோவ் ஹசு (சீனதைபே), இந்தியாவின் ஸ்ரீராம் பாலாஜி - ஆன்ட்ரி பெக்மேன் ஜோடி தோல்வியை தழுவின.