சர்வதேச ஹாக்கி கூட்டமைப்பு சார்பில் புரோ லீக் ஹாக்கி 5வது சீசன் நடக்கிறது. மொத்தம் 9 அணிகள் பங்கேற்கின்றன. ஸ்பெயின், நெதர்லாந்தை வீழ்த்திய இந்தியா, ஆஸ்திரேலியாவிடம் வீழ்ந்தது. பின் அயர்லாந்தை வீழ்த்தி எழுச்சி கண்டது.

ஒடிசா மாநிலம் ரூர்கேலாவில் நடந்த போட்டியில் இந்தியா, ஸ்பெயின் அணிகள் மீண்டும் மோதின. ஆட்டத்தின் முதல் நிமிடத்தில் இந்தியாவின் ஜர்மன்பிரீத் சிங் ஒரு 'பீல்டு' கோல் அடித்தார். இதற்கு 3வது நிமிடத்தில் கிடைத்த 'பெனால்டி கார்னர்' வாய்ப்பில் ஸ்பெயினின் ஜோஸ் பாஸ்டெரா ஒரு கோல் அடித்தார்.

தொடர்ந்து அசத்திய ஸ்பெயின் அணிக்கு 15வது நிமிடத்தில் போர்ஜா லகாலே ஒரு 'பீல்டு' கோல் அடித்தார். முதல் பாதி முடிவில் இந்திய அணி 1-2 என பின்தங்கி இருந்தது.

இரண்டாவது பாதியில் எழுச்சி கண்ட இந்திய அணிக்கு 35வது நிமிடத்தில் கிடைத்த 'பெனால்டி கார்னர்' வாய்ப்பில் அபிஷேக் ஒரு கோல் அடித்தார். தொடர்ந்து போராடிய இரு அணியினரால் கூடுதலாக கோல் அடிக்க முடியவில்லை. ஆட்டநேர முடிவில் போட்டி 2-2 என சமநிலை வகித்தது.

இதனையடுத்து வெற்றியாளரை தீர்மானிக்க போட்டி 'பெனால்டி ஷூட் அவுட்' முறைக்கு சென்றது. இதில் இந்திய அணி 8-7 என்ற கணக்கில் 'திரில்' வெற்றி பெற்றது.