அல்லு அர்ஜூனின் 'ராக்கா': விரைவில் பெரிய அறிவிப்பு வரும் என படக்குழு சூசகம்!

அல்லு அர்ஜூன் மற்றும் இயக்குநர் அட்லி கூட்டணியில் உருவாகும் 'ராக்கா' படம், தற்போது தயாரிப்பில் உள்ளது. கடந்த ஏப்ரல் மாதம் படக்குழுவினர் அப்படத்தின் தலைப்பையும் பர்ஸ்ட் லுக் போஸ்டரையும் வெளியிட்ட போதிலும், ரசிகர்கள் ஒரு கிளிம்ப்ஸ் வீடியோவிற்காகக் காத்திருக்கின்றனர்.

ஆகஸ்ட் மாதத்திலேயே படக்குழு ஒரு வீடியோவை வெளியிட்டு, கதைக்களத்தின் உலகத்தை அறிமுகப்படுத்தும் என்று செய்திகள் வெளியாகின. ஆனால் அது நடக்கவில்லை. இந்நிலையில், '37' என்ற எண்ணுடன் ஒரு பெரிய அறிவிப்பு தயாராகி வருகிறது என்ற வரிகள் அடங்கிய சுவாரசியமான போஸ்டரை படக்குழு தற்போது வெளியிட்டுள்ளது. இது ஒரு முக்கியமான அப்டேட்டாகவோ அல்லது ரசிகர்கள் ஆவலுடன் எதிர்பார்க்கும் கிளிம்ப்ஸ் வீடியோவாகவோ இருக்கலாம் என்று எதிர்பார்க்கப்படுகிறது.

புஷ்பா- 2 படத்தின் மூலம் இந்திய சினிமாவிலேயே மிகப்பெரிய பிளாக்பஸ்டர் வெற்றியைத் தந்த அல்லு அர்ஜூன், நாட்டின் முன்னணி நட்சத்திரங்களில் ஒருவராக தன்னை நிலைநிறுத்திக் கொண்டார். இதனால் ராக்கா படத்தின் மீது மிகப்பெரிய எதிர்பார்ப்பும் ஆர்வமும் ஏற்பட்டுள்ளது.

இந்த ராக்கா படப்பிடிப்பை முழுமையாக மும்பையிலேயே நடத்தி வரும் நிலையில், படம் பற்றிய எந்தத் தகவலும் அதிகாரப்பூர்வமற்ற வழிகளில் கசியாதவாறு படக்குழுவினர் கவனமாகப் பார்த்துக்கொள்கின்றனர். இப்படத்தில் தீபிகா படுகோனே கதாநாயகியாக நடிக்கிறார். தவிர, ராஷ்மிகா மந்தனா, ஜான்வி கபூர் மற்றும் மிருணாள் தாக்கூர் ஆகிய நடிகைகளும் இதில் நடித்திருப்பதாக தகவல்கள் தெரிவிக்கின்றன. என்றாலும், படக்குழு இன்னும் அதிகாரப்பூர்வமாக உறுதிப்படுத்தவில்லை. இப்படத்திற்கு சாய் அபயங்கர் இசையமைக்கிறார்.