நியூசிலாந்து சென்ற வெஸ்ட் இண்டீஸ் அணி, ஐந்து போட்டிகள் கொண்ட 'டி-20' தொடரில் பங்கேற்கிறது. முதலிரண்டு போட்டிகளின் முடிவில், தொடர் 1-1 என சமநிலையில் இருந்தது. மூன்றாவது போட்டி நெல்சனில் நடந்தது.

'டாஸ்' வென்று முதலில் 'பேட்' செய்த நியூசிலாந்து அணிக்கு கான்வே, டிம் ராபின்சன் ஜோடி நல்ல துவக்கம் தந்தது. முதல் விக்கெட்டுக்கு 47 ரன் சேர்த்த போது ராபின்சன் (23) அவுட்டானார். ரச்சின் ரவிந்திரா (26) ஆறுதல் தந்தார். கான்வே (56) அரைசதம் கடந்தார். டேரில் மிட்செல் (41) ஓரளவு கைகொடுத்தார்.

நியூசிலாந்து அணி 20 ஓவரில், 9 விக்கெட்டுக்கு 177 ரன் எடுத்தது.

சவாலான இலக்கை விரட்டிய வெஸ்ட் இண்டீஸ் அணிக்கு அதனாசே (31), அக்கீம் (24) ஆறுதல் தந்தனர். கேப்டன் ஷாய் ஹோப் (1), ரூதர்போர்டு (2), ராவ்மன் பாவெல் (2), ஜேசன் ஹோல்டர் (3) சோபிக்கவில்லை. கடைசி ஓவரில் வெற்றிக்கு 12 ரன் தேவைப்பட்டது. கைல் ஜேமிசன் பந்துவீசினார். முதல் நான்கு பந்தில் 2 ரன் மட்டும் விட்டுக்கொடுத்தார். அடுத்த பந்தில் ரொமாரியோ ஷெப்பர்டு (49) அவுட்டானார். வெஸ்ட் இண்டீஸ் அணி 19.5 ஓவரில் 168 ரன்னுக்கு 'ஆல்-அவுட்'டாகி தோல்வியடைந்தது. நியூசிலாந்து சார்பில் இஷ் சோதி, ஜேக்கப் டபி தலா 3 விக்கெட் சாய்த்தனர்.

நியூசிலாந்து அணி 2-1 என முன்னிலை பெற்றது. ஆட்ட நாயகன் விருதை இஷ் சோதி வென்றார்.