லோகேஷ் கனகராஜின் 'கைதி' வெளியாகி 7 ஆண்டுகள் நிறைவு! 'கைதி-2' எப்போது?

நடிகர் கார்த்தியின் சிறந்த படங்களில் 'கைதி' முக்கியமான படமாகும். மேலும், இது இயக்குனர் லோகேஷ் கனகராஜின் திரையுலகப் பயணத்திலும் ஒரு முக்கியமான திரைப்படமாகும். இன்று இப்படம் வெளியாகி 7வது ஆண்டு நிறைவடையும் நிலையிலும், இதன் இரண்டாம் பாகம் குறித்த தெளிவான அறிவிப்புக்காக ரசிகர்கள் இன்னமும் காத்திருக்கின்றனர்.

கடந்த சில வருடங்களாகவே இதன் இரண்டாம் பாகத்தை உருவாக்குவது குறித்து லோகேஷ் பேசி வருகிறார். ரசிகர்களும் இது நிச்சயமாக நடக்கும் என்று நம்பி வருகின்றனர். இருப்பினும், தற்போது அவர், அல்லு அர்ஜூனின் அடுத்தப்படத்தில் பிஸியாக இருப்பதுடன், தனது நடிப்புத் துறையிலும் கவனம் செலுத்தி வருகிறார்.

இதுபோன்ற சில காரணங்களால், கைதி-2 தொடர்ந்து தாமதங்களைச் சந்தித்து வருகிறது. இரண்டாம் பாகத்தை எடுப்பது லோகேஷின் திட்டத்தில் இருந்தபோதிலும், இதன் படப்பிடிப்பு எப்போது தொடங்கும் என்பதற்கான தெளிவான காலவரையறை எதுவும் இன்னும் இல்லை.

'எல்சியு' அமைப்பின் முதல் படமாக அமைந்த கைதி, இந்தத் தொடர் கதைக்களத்திற்கான வலுவான அடித்தளத்தை அமைத்தது. அதன் ஏழாவது ஆண்டு நிறைவில், மிகவும் எதிர்பார்க்கப்படும் இரண்டாம் பாகம் குறித்த அறிவிப்பு வரும் என ரசிகர்கள் நம்புகின்றனர். இருப்பினும், லோகேஷின் தற்போதைய கமிட்மென்ட்களைப் பார்க்கும்போது, இது தொடங்குவதற்கு ரசிகர்கள் இன்னும் சில காலம் காத்திருக்க வேண்டியிருக்கும் போல தெரிகிறது.