நமது உண்மை... நமது வரலாறு... ராமாயணா டிரைலர் வெளியானது : மிரட்டும் பிரமாண்டம்

இந்தியாவின் புராண காவியமான ராமாயணம் பல்வேறு தொடர்களாக, படங்கள் வெளியாகி உள்ளன. ஹிந்தியில் நிதேஷ் திவாரி இயக்கத்தில் தற்போது உருவாகி உள்ள படம் ‛ராமாயணா'. ராமராக ரன்பீர் கபூர், சீதையாக சாய் பல்லவி, லட்சுமணனாக ரவி தூபே, ராவணனாக யஷ், ஹனுமனாக சன்னி தியோல், சூர்ப்பனகையாக ரகுல் ப்ரீத் சிங் உள்ளிட்டோர் நடித்துள்ளனர். ஆஸ்கர் விருது பெற்ற ஏஆர் ரஹ்மான் மற்றும் ஹாலிவுட் இசையமைப்பாளர் ஹேன்ஸ் ஜிம்மர் இசையமைத்துள்ளனர். சுமார் ரூ.4,000 கோடி பட்ஜெட்டில் இந்தியாவில் அதிக பொருட்ச் செலவில் இரு பாகங்களாக தயாராகி உள்ளது. நிமித் மல்கோத்ரா தயாரித்துள்ளார்.

முதல் பாகம் தீபாவளிக்கு வெளியாக உள்ள நிலையில் படத்தின் புரொமோஷன் பணிகள் முழு வீச்சில் துவங்கி உள்ளன. இந்த படத்திற்கு அதிக எதிர்பார்ப்பு இருக்கிறது. குறிப்பாக உலகளவில் ஹாலிவுட் படத்தை சோனி என்டர்டெயின்ட்மென்ட் நிறுவனம் தயாரித்துள்ளது.

இந்த படத்தின் டிரைலர் ஜூலை 24ம் தேதி வெளியாக வேண்டியது. இந்நிலையில் இன்று(ஜூலை 30) அதிகாலை பிரம்ம முகூர்த்தத்தில் 4:15 மணியளவில் டிரைலரை வெளியிட்டனர். ஹிந்தி மட்டுமல்லாது தமிழ், தெலுங்கு உள்ளிட்ட 5 மொழிகளில் டிரைலரை வெளியிட்டுள்ளனர். 4 : 09 நிமிடங்கள் ஓடும் இந்த டிரைலர் பிரமாண்டமாக உள்ளது. குறிப்பாக கிராபிக்ஸ் காட்சிகள் அற்புதமாக உள்ளன.

ராவணின் அசுர எழுச்சி, மூன்று உலகங்களையும் ஆளுவதில் டிரைலர் தொடர்கிறது. அப்படியே ராமர் பிறப்பு, சீதையுடன் திருமணம், வனவாசம் புறப்படுதல், லட்சுமணனால் சூர்ப்பனகை மூக்கு அறுபடுவது, தங்கைக்காக ராமரை அழிக்க முற்பட்டு சீதையை ராவணன் கடத்துவது, மனைவியை மீட்க, ராவணனை அழிக்க ராமர் புறப்படுவது என டிரைலர் விரிகிறது. நான்கு நிமிட டிரைலரில் ஓரளவு ராமாயணத்தின் கதையை சொல்லி விட்டனர்.
எல்லோருக்கும் தெரிந்த கதை தான் என்றாலும் அதை காட்சிப்படுத்தும் விதம் என்பது புதுமையாக உள்ளது. இந்த டிரைலரை பொருத்தமட்டில் முழுக்க கிராபிக்ஸ் மற்றும் விஎப்எக்ஸ் காட்சிகள் பிரமிக்க வைக்கின்றன. குறிப்பாக படத்தின் டிரைலரில் காண்பிக்கப்பட்டுள்ள செட்டுகள், அதற்கு பொருத்தமான நடிகர்கள் என அவ்வளவு அழகாக உள்ளன. அதேசமயம் ஹனுமன் பற்றி ஒரு சிறிய காட்சி கூட டிரைலரில் இடம் பெறாதது குறையாக இருப்பதாக ரசிகர்கள் பெரும்பாலும் சுட்டிக் காட்டி உள்ளனர்.

5 மொழிகளில் வெளியான டிரைலரில் ஹிந்தி பதிப்புக்கு அதிக வரவேற்பு கிடைத்துள்ளது. வெளியான 6 மணிநேரத்தில் சுமார் 50 லட்சம் பார்வைகளை பெற்றுள்ளது. அதற்கடுத்து தெலுங்கு 10 லட்சமும், கன்னடம் 8 லட்சமும், தமிழ் 4.5 லட்சமும், மலையாளம் 1 லட்சம் பார்வைகளையும் பெற்றுள்ளன.